சூதாட்டங்கள் தடை செய்யப்பட வேண்டும்,

 இன்றைய நவீன உலகில் சூதாட்டம் ஒரு பொழுது போக்காகவும் உல்லாசத்தின் அடையாளமாகவும் கருதப்படுகிறது.

 அதை தனிமனித உரிமையாகவும் திறமையின் அடையாளமாகவும் காட்ட சிலர் முயல்கிறார்கள்.

 ஒரு காலத்தில் இரக்சியமாக சிலர் திருட்டுத்தனமாக செய்து வந்த இந்த அநாகரீகத்தை அரபு நாடுகள் உள்பட மக்கள் உல்லாசத்திற்காக கூடுகிற இடங்கள் எங்கும் கேஸினோக்கள் என்ற பெயரில் இப்போது வண்ண விளக்குகளால் அலங்கரித்து ஆர்ப்பாட்டமாக நடத்துகின்றனர்.

 இஸ்ரேலில் இருந்து எகிப்துக்குள் நுழையும், தாபா எல்லையில் ஒரு வித்தியாசமான போர்டு இருந்தது. உள்ளே நுழைபவர்களுக்கு எவ்வளவு கட்டணம் என்ற தகவல்கள் அதிலிருந்தன. இதில் ஒரு ஆச்சரியம் எல்லையிலிருந்து ஒரு கிலோ மீட்டருக்குள் பயணம் செய்வோருக்கு கட்டணம் எதுவும் இல்லை என்று எழுதியிருந்தது. இது என்ன வித்தியாசமாக இருக்கிறதே என்று விசாரித்த போது அங்குள்ளவர்கள் சொன்னார்கள். இந்த ஒரு கிலோ மீட்டருக்குள் நிறைய சூதாட்ட விடுதிகள் இருக்கின்றன. அதில் வந்து போகிறவர்களுக்கு சிரமம் இருக்க கூடாது என்பதற்காக இந்த ஏற்பாடு என்று கூறினார்கள்.

 சூதாட்டத்தை பணம் சம்பாதிக்கும் ஒரு வழியாகவும் சூதாட்ட விடுதிகளை சுற்றுலா பயணிகளை கவரும் ஒரு ஏற்பாடாகவும் கருதுகிற வழக்கம் இப்போது மிகவும் சகஜமாகியிருக்கிறது.

 இது புதிய சிந்தனை அல்ல. ஆகப் பழைய கருத்து.

 திருக்குர் ஆன் சூதாட்ட்த்தை மய்ஸிர் என்கிறது. மய்சிர் என்றால் எளிதான சம்பாத்திய வழி என்று பொருள்.

 தமிழில் சூதாட்டம் என்று சொல்லுகிற போதே அதில் ஒரு கெடுதி இருப்பது வெளிப்படும். அரபு நாடுகளில் மய்ஸிர் என்று சொல்லுகிற போதே அதை ஒரு இயல்பான நற்காரியாமாக கருதுகிற பழக்கம் இருந்தது.

 பண்டைய அரபிகள் சூதாடிக் கிடைக்கிற பணத்தை தர்மம் செய்வார்கள். எளிதாக சம்பாதித்து அதிகம் தர்மம் செய்தல் என்பதனாலே மய்ஸிர் என்று பெயர் சூட்டினார்கள். அதை பெருமையாக நினைத்தர்கள்.

 ஆனால் இஸ்லாம் வன்மையாக அதை தடை செய்த்து. அதன் அத்தனை வழிகளையும் அடைத்தது.     

 திருக்குர் ஆனின் வரலாற்றுச் சாதனைகளில் ஒன்று அது சூதாட்டத்தை வன்மையாக கண்டித்து தடை செய்துள்ளது.

 أَيُّهَا الَّذِينَ آَمَنُوا إِنَّمَا الخَمْرُ وَالمَيْسِرُ وَالأَنْصَابُ وَالأَزْلَامُ رِجْسٌ مِنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ {المائدة:90}

 சூதாட்டத்தை  மேற்கத்திய உலகு நாகரீகத்தின் அம்சமாக காட்ட முயற்சிக்கிற போது இஸ்லாம் அதை இழிவானதென்றும் வாழ்க்கை தோற்றுப் போக வழி வகுக்கும் உரத்து சொல்கிறது.

 திருக்குர் ஆனிய ஆய்வாளர்கள் சூதாட்டின் தீமை வட்டியை விட கொடியது என்கிறார்கள். ஹராமான சம்பாத்தியத்தை உண்ணுதல், ஹரமான விளையாட்டில் ஈடுபடுதல் என்ற இரண்டு ஹராம்கள் சூதாட்டத்தில் இருக்கின்றன.

 சூதாட்ட்ட்தின் அனைத்து வகைகளும் வடிவங்களும் ஹராம் என இஸ்லாம் எச்சரிக்கிறது.

 قَالَ النَّبِي صلى الله عَلَيْهِ وَسلم:  إِن رجَالًا يتخوضون فِي مَال الله بِغَيْر حق فَلهم النَّار يَوْم الْقِيَامَة ،

 சூதாடலாமா என்று கேட்பதே கூட குற்றம்.

 وَفِي صَحِيح البُخَارِيّ أَن رَسُول الله صلى الله عَلَيْهِ وَسلم قَالَ: من قَالَ لصَاحبه تَعَالَ أقامرك فليتصدق ؛ فَإِذا كَانَ مُجَرّد القَوْل يُوجب الْكَفَّارَة أَو الصَّدَقَة؛ فَمَا ظَنك بِالْفِعْلِ

 சூதாட்டப் பணத்தில் கிடைக்கும் சுகங்கள் நரகிற்கு செல்லவே உரியவை

 أَن رَسُول الله صلى الله عَلَيْهِ وَسلم قَالَ  كُلُّ جَسَدٍ نَبَتَ مِنْ سُحْتٍ فَالنَّارُ أَوْلَى بِهِ رواه الطبراني

 சூதாட்டம் என்றால் என்ன ?

ஒரு போட்டி அல்லது விளையாட்டில் கலந்து கொள்ளும் தரப்பினர் கொடுக்கும் பணத்தை யாரேனும் ஒருவர் அல்லது சிலர்  எடுத்துச்  செல்வது சூதாட்டமாகும்.

 இஸ்லாம் இதில் நிச்சயமற்ற பந்தயங்களையும் சேர்த்தது.

 திருக்குர் ஆனில்  பூமியின் தாழ்ந்த  நிலத்தில் ரோமர்கள் தோற்கடிக்கப் பட்டுள்ளனர். ஆனால் அவர்கள் விரைவில் மீண்டெழுவார்கள் என்ற கருத்தில் ஒரு வசனம் அருளப்பட்ட்து.

 الم * غُلِبَتِ الرُّومُ * فِي أَدْنَى الْأَرْضِ وَهُمْ مِنْ بَعْدِ غَلَبِهِمْ سَيَغْلِبُونَ* فِي بِضْعِ سِنِينَ لِلَّهِ الْأَمْرُ مِنْ قَبْلُ وَمِنْ بَعْدُ وَيَوْمَئِذٍ يَفْرَحُ الْمُؤْمِنُونَ * بِنَصْرِ اللَّهِ يَنْصُرُ مَنْ يَشَاءُ وَهُوَ الْعَزِيزُ الرَّحِيمُ﴾ [الروم: 1 ـ 7].

 ஜோர்டானில் உள்ள சாக்கடல் பள்ளத்தாக்கு பகுதியை பாரசீகர்கள் வெற்றி பெற்றதை குறித்து இந்த வசனம் பேசுகிறது. அது உலகில் கடல் மட்டத்திலிருந்து மிக தாழ்வாக இருக்கிற நிலப்பகுதியாகும்.

 (இது திருக்குர் ஆனின் முஃஜிஸாக்களில் ஒன்று. ஏனெனில் குர் ஆன் இறங்கிய காலத்தில் இந்த இடம் கடல் மட்ட்த்திலிருந்து மிக தாழ்ந்த இடம் என்ற செய்தி உலகிற்கு தெரிந்திருக்கவில்லை. பிற்காலத்தில் அதை மக்கள் புரிந்து கொண்டனர்.)

 மக்காவின் காபிர்கள் பாரசீகர்களின் ஆதரவாளர்களாக இருந்தனர். அதனால் அபூபக்கர் சித்தீக் ரலி அவர்களிடம் வம்புக்கு வந்தனர். அதென்ன ரோமர்கள் ஜெயித்து விடுவார்களா ? பந்தயம் வைத்துக் கொள்ளலாமா என்றனர். 3 வருடத்தில் இந்த வெற்றி நிகழு வேண்டும் அதற்கு 10 ஒட்டகை என்ற பணயம் என்று தீர்மானித்தனர். பெருமானார் (ஸல்) அவர்கள் பிழஃ என்பது 3 லிருந்து 3 லிருந்து 9 க்குள் இருக்கலாம் என்றார்கள். அபூபக்கர் சித்தீக் ரலி திரும்ப காபிர்களிடம் சென்று பந்தயக் காலத்தையும் தொகையையும் அதிகப்படுத்திக் கொள்ளலாமா என்று கேட்டார்கள். அதற்கு அவர்கள் சம்மதிக்கவே 10 ஆண்டுகள் என்றும் 100 ஒட்டகைகள் என்றும் தீர்மாணிக்கப்பட்டது. 5 வருடங்களில் ரோமர்கள் பாரசீகர்களை வென்றனர். தீர்மாணித்த படி ஒட்டகைகள் அபூபக்கர் ரலி அவர்களுக்கு வந்தது. அதை சூது என்று கூறி தர்ம்ம் செய்து விட பெருமானார்  உத்தரவிட்டார்கள்/

 عن البراء قال : لما نزلت : ( الم غلبت الروم في أدنى الأرض وهم من بعد غلبهم سيغلبون ) قال المشركون لأبي بكر : ألا ترى إلى ما يقول صاحبك ؟ يزعم أن الروم تغلب فارس . قال : صدق صاحبي . قالوا : هل لك أن نخاطرك ؟ فجعل بينه وبينهم أجلا فحل الأجل قبل أن تغلب الروم فارس ، فبلغ ذلك النبي - صلى الله عليه وسلم - فساءه ذلك وكرهه ، وقال لأبي بكر : " ما دعاك إلى هذا ؟ " قال : تصديقا لله ولرسوله . فقال : " تعرض لهم وأعظم الخطر واجعله إلى بضع سنين " . فأتاهم أبو بكر فقال لهم : هل لكم في العود ، فإن العود أحمد ؟ قالوا : نعم . [ قال ] فلم تمض تلك السنون حتى غلبت الروم فارس ، وربطوا خيولهم بالمدائن ، وبنوا الرومية ، فجاء به أبو بكر إلى النبي - صلى الله عليه وسلم - فقال : هذا السحت ، قال : " تصدق به " .

 சீட்டாட்டம் தாயம் போன்ற சூதாட்டத்திற்கென்றே உள்ள விளையாட்டுக்களும் இஸ்லாத்தில் தடை செய்யப்பட்டுள்ளன. அதிஷ்ட்த்தை அடிப்படையாக கொண்ட லாட்டரி குதிரைப்பந்தயம் போன்ற  போட்டிகளும் பந்தயங்களும் இஸ்லாத்தில் தடை செய்யப்பட்டுள்ளன.

 நவீன சீட்டாட்ட வடிவமாக இருக்கிற ஆன்லைன் ரம்மி போன்ற வடிவங்கள் அனைத்தும் தடை செய்யப்பட்டுள்ளன.

 இதில் தெளிவான விளக்கத்திற்கு வேறு எதுவும் தேவையில்லை. இது சம்பாதிக்கும் நேர் வழி அல்ல என்பது ஒவ்வொரு மனிதனுக்கும் தெளிவாகவே தெரிந்திருக்கிறது.

 ஒரு காலத்தில் எப்போதாவது எங்காவது மறைமுகமாக நடைபெற்று வந்த சூதாட்டம் இப்போதைய ஸ்மார்ட் போன்களின் உலகில் எங்கிருந்து வேண்டுமானாலும் எப்போது வேண்டுமானாலும் விளையாடலாம் என்ற சூழ்நிலை உருவாகிவிட்டது. அது மட்டுமல்ல சகஜமாக பெண்களும் சிறுவர்களும் கூட இதில் சிக்கிக் கொள்கின்றன.

 நீங்கள் விளையாடுவதற்கு பணம் தருகிறோம் என்று போலித்தனமாக கூறி ஆட்களை உள்ளே இழுக்கிறார்கள்.  ஒரு சிலரை வெற்றி பெறுவது போல காட்டி ஏரளமான மக்களின் சிலர் சுருட்டிக் கொள்கிறார்கள்.

சூதாட்ட்த்தின் தீமைகள் கொஞ்ச நஞ்சமல்;ல  

சூதாட்டம்

1.   மனிதனின் உழைக்கும் திறனை கெடுக்கிறது.

 2.   குடும்பங்கள் சீரழிய காரணமாகிறது.

3.   மனிதன் சுயமரியாதையை இழக்க காரணமாகிறது.

4.   பகை பொறாமையை உண்டாக்குகிறது.

5.   தீய குணங்களுக்கு காரணமாகிறது. மோசமான இயல்புகளை உருவாக்குகிறது. – மோசடி – போதை – கொள்ளை-

6.   நேரத்தை வீணடித்து சோம்பலை உருவாக்குகிறது.

7.   திருடியாவது ஜெயிக்க வேண்டும் என்ற வெறியை ஏற்படுத்துகிறது.

8.   பதட்டம் மன நோயுக்கு காரணமாகிறது.

 சூதாட்டம் தனி மனித வாழ்வையும் குடும்பங்களின் வளத்தையும் சமூகங்களின் அமைதியையு கெடுக்க கூடியது என்று உபதேசிக்காதவர்கள் யாரும் இல்லை

 “பகடை உருட்டும் ஓசையைக் கேட்கும் போதெல்லாம். நான் குடும்பம் முழுவதற்கும் சாவுமணி அடிக்கும் ஓசையைக் கேட்கிறேன். என்றார் அறிஞர்- ஜெரால்டு

 சூதாடும் கருவியைக் கையிலெடுத்துக்கொண்ட நிமிட்த்திலேயே ஒரு மனிதன் தற்கொலை செய்து கொள்ள தயாராகிறான்  என்றே நான் கருதுகிறேன் என்றார்- கம்பர்லந்து

 நம் இந்திய நாட்டின் பழம் புராணங்கள் பலவும் சூதாட்ட்த்தின் மிக மோசமன விளைவை சுட்டிக் காட்டி போதிப்பவை யாகும்

 மஹாபாரதம் பாண்டவர்கள்  சூதாட்டத்தில் தோற்றுப் போய் ஒரு கட்டத்தில் மனைவியை கூட பணயம் வைத்தார்கள்  என்று பேசுகிறது.

 நிடத நாட்டு மன்னன் நளன் அவனது மனைவி தமயந்தி புகழ் வாய்ந்த தம்பதிகள். நீரும் நெருப்பும் இன்றி சமையல் செய்வதில் வல்லவன் நளன் என்று போற்றப்படுகிறவன், சூதாட்ட்த்தில் ஈடுபட்டு நாட்டை இழந்து அவனும் அவனது காதல் மனைவியும் காடு மலைகளில் கஷ்டப்பட நேர்ந்த்து என்ற கதையையும் மஹாபாரதும் கூறுகிறது.

 மஹாபாரதம் மொத்தமுமே சூதாட்ட்த்தின் கேடுபற்றி கூறக்கூடிய கதைகளை கொண்டது தான் என்று சொன்னால் அது மிகையல்ல.

 நிலமை இப்படி இருக்க இந்தியாவை தற்போது இந்து மதத்தின் பெயரால் ஆள்வதாக கூறிக் கொள்ளும் கட்சி சூதாட்ட்த்திற்கு ஆதரவாக இருக்கிறது.

 அக்கட்சியின் பின்புலத்தை கொண்ட தமிழக ஆளுநர் ஆன் லைன் சூதாட்ட்த்தை தடை செய்து தமிழக அரசு நிறைவேற்றிய சட்ட்த்திற்கு ஒப்புதல் தராமல் அதை திருப்பி அனுப்பியிருக்கிறார்.

 ஆன்லைன் விளையாட்டுக்கான விளம்பரங்களும் அழைப்புக்களும் சகஜமாகிவிட்ட நிலையில் திடீர் திடீரென தற்கொலைகளும் அதிகரித்து வருவதை அனைவரும் கவலையோடு கவனித்து வருகின்றனர்

 சென்னை மணலி எம்.ஜி.ஆர். நகர் கால்தோட்டம் பகுதியைச் சேர்ந்த 26 வயதான பார்த்திபன் என்பவர், ஆன்லைன் ரம்மியை விளையாடும் பழக்கம் உடையவர். இதில் பெரும் பணத்தை இழந்த நிலையில், மனைவி மூலம் மகளிர் சுய உதவிக் குழுவிடமிருந்து 50,000 ரூபாயைக் கடனாகப் பெற்றார்.

அந்தப் பணத்தையும் ஆன்லைன் ரம்மியில் இழந்தார். கடன் கொடுத்தவர்கள் நெருக்கிய நிலையில், செவ்வாய்க் கிழமை இரவு தனது வீட்டில் தூக்கிட்டுத் தற்கொலை செய்து கொண்டார்

 தென்காசி மாவட்டம் சங்கரன்கோவிலைச் சேர்ந்த வேலாயுதபுரம் கிராமத்தில் ஒடிசா மாநிலத்தைச் சேர்ந்த வந்தனா மாஜி தன் கணவருடன் வசித்து வந்தார்.

இருவரும் ஒரு நூற்பாலையில் பணியாற்றி வந்தனர். கணவன் - மனைவி இருவருக்குமே ஆன்லைனில் ரம்மி விளையாடும் பழக்கம் இருந்து வந்தது. பண இழப்பு ஏற்பட்டதும் கணவர் அந்தப் பழக்கத்தை நிறுத்திவிட்ட நிலையில், மனைவி வந்தனா அதைத் தொடர்ந்து வந்திருக்கிறார்.

கிட்டத்தட்ட 70 ஆயிரம் ரூபாய் அளவுக்குக் கடன் ஏற்பட்ட நிலையில், கணவன் - மனைவிக்கு இடையில் தொடர்ந்து தகராறு ஏற்பட்டிருக்கிறது. இந்நிலையில், வந்தனா தற்கொலை செய்துகொண்டார்.

 தினசரி இத்தகைய செய்திகளை நாளீதழ்களி வாசித்த சென்னை உயர் நீதிமன்ற நீதிபதி ஒரு எப்போது இந்த கொடுமையை தடுக்கப் போகிறீர்கள் என்று கேள்வி கேட்டார்.

 அதன் பிறகு  2020ஆம் ஆண்டில் அப்போதைய அதிமுக தலைமையிலான  தமிழ்நாடு அரசு இந்த விளையாட்டைத் தடைசெய்ய ஒரு சட்டத்தைக் கொண்டு வந்தது. அந்தச் சட்டத்திற்கு அப்போதைய ஆளுநர் பன்வாரிலால் புரோஹித் ஒப்புதல் அளித்துவிட்டாலும், அதை எதிர்த்து ஆன்லைன் விளையாட்டு நிறுவனங்கள் நீதிமன்றத்தை அணுகின. சென்னை உயர்நீதிமன்றம் இந்தச் சட்டம் செல்லாது என அறிவித்தது.

 இதற்குப் பிறகு தி.மு.க. தலைமையிலான புதிய அரசு பதவியேற்றதும், ஆன்லைன் ரம்மியைத் தடைசெய்ய சட்டம் இயற்றுவது குறித்து ஆராய ஒரு குழு அமைத்தது. அந்தக் குழு அளித்த பரிந்துரைகளின் பேரில் சட்டம் இயற்ற முடிவு செய்யப்பட்டது. அதன்படி, இந்த அக்டோபர் மாதத் துவக்கத்தில் இந்த விளையாட்டைத் தடை செய்து அவசரச் சட்டம் இயற்றப்பட்டது. இதற்கிடையில் சட்டமன்றம் கூடியதால், புதிய சட்டம் இயற்றப்பட்டு ஆளுநருக்கு அனுப்பப்பட்டது.

 அந்த சட்டம் என்ன கூறுகிறது எனில்

 தடைசெய்யப்பட்ட விளையாட்டுகளை விளையாடுபவர்களுக்கு மூன்று மாதங்கள் வரை சிறைத்தண்டனை அல்லது ரூ. 5,000 வரை அபராதம் அல்லது இரண்டும் விதிக்கப்படும்.

தடைசெய்யப்பட்ட விளையாட்டுகளை வழங்குபவர்களுக்கு மூன்று ஆண்டுகள் வரை சிறைத்தண்டனை அல்லது ரூ.10 லட்சம் வரை அபராதம் அல்லது இரண்டும் விதிக்கப்படும்.

 சட்டமன்றம் கூடியதிலிருந்து ஆறு வாரங்களில் அவசரச் சட்டம் காலாவதியாகும் என்பதால், கடந்த நவம்பர் 17ஆம் தேதி இந்தச் சட்டம் காலாவதியானது.

 இந்த நிலையில், இந்தச் சட்டத்தில் சில சந்தேகங்கள் இருப்பதாக ஆளுநர் கேள்வியெழுப்பியிருந்தார். அந்தக் கேள்விகளுக்கு தமிழ்நாடு அரசு பதிலளித்தது. இருந்தும் ஆளுநர் இதுவரை ஒப்புதல் அளிக்கவில்லை.

இந்நிலையில், தமிழ்நாடு சட்டத்துறை அமைச்சர் ரகுபதி ஆளுநர் ஆர்.என். ரவியை ஆளுநர் மாளிகையில் சந்தித்து, சட்டத்திற்கு ஒப்புதல் அளிக்கும்படி கோரினார்.

 சட்டம் தனது பரிசீலினையில் இருப்பதாகவும் விரைவில் அது குறித்து நடவடிக்கை எடுப்பதாகவும் ஆளுநர் கூறினார்.

 நமக்கு புரியத புதிர் என்ன வென்றால் பல குடும்பங்களை காவு வாங்கிக் கொண்டிருக்கிற வேதங்களும் புராணங்களும் இதிகாசங்களும் இழித்துப் பேசுகிற ஒரு பேசுகிற ஒரு தீமையை தடுப்பதில் மனநலமுள்ள ஒரு ஆளுநர் ஏன் தமதப்படுத்துகிறார் என்பது புரியவில்லை.   

 ஆளுநர் என்ன கூறியிருக்கிறார்  என்று வரும் செய்திகள் அதிர்ச்சியளிக்கின்றன,

 ஒரு நபரின் திறமையைக் கொண்டு சம்பாதிப்பது அரசியலமைப்பின் 19 (1) (g) பிரிவின் கீழ் அவரது அடிப்படை உரிமையாக உத்தரவாதம் அளிக்கப்படுகிறது.

 சூதாடுவதை சமபாதிப்பதாக கூறினால் அதை திறமை என்று வகைப்படுத்தினால் திருடுவதையும் கொள்ளயடிப்பதையும் மோசடி செய்வதையும் கூட நியாயப்படுத்த முடியாதா என்று மேதகு ஆளுநர் யோசிக்க வில்லை

 மாநில அரசு சூதாட்ட தடை சட்ட்த்தை மீண்டும் சட்டமன்றத்தில் நிறைவேற்றி மக்களை பாதுகாக்க வேண்டும்.

 முஸ்லிம் உம்மத் முஹம்மது நபி (ஸல்) அவர்களால வழிகாட்டப் பட்டு இத்தகைய தீய வழிகளிலிருந்து வெகு தூரம் பாதுகாப்பட்ட சமுதாயம்.

 அந்த சமுதாயம் இன்றைய பகட்டான விளம்பரங்களை ஆசை வார்த்தைகளை கண்டும் வழி தவறி விடாமல் எச்சரிக்கையாக இருக்க வேண்டியது அவசியம்.

 குடிப்பது கால் கஞ்சியாக இருந்தாலும் அது ஹலாலாக இருக்க வேண்டும் என்ற சிந்தனை நம்முடையது. காரணம் அதில் தான் நிம்மதி இருக்கிற்து. ஆரோக்கியம் இருக்கிறது.

 அல்லாஹ் தவ்பீக் செய்வானாக!